მოსკოვის ვნუკოვოს აეროპორტში აშშ-ს სამხედრო-საჰაერო ძალების მძიმე სამხედრო-სატრანსპორტო თვითმფრინავი Boeing C-17 Globemaster III დაეშვა. ამის შესახებ ცნობა თავდაპირველად РБК-მ Flightradar24-ის მონაცემებზე დაყრდნობით გაავრცელა.
თვითმფრინავი 23 აგვისტოს მერილენდის შტატში მდებარე ენდრიუსის ავიაბაზიდან აფრინდა. თავდაპირველად ის რიგაში ჩაფრინდა, სადაც ორი დღე გაატარა, შემდეგ კი პირდაპირ მოსკოვისკენ გაემართა.
ენდრიუსის ავიაბაზა ცნობილია, როგორც აშშ-ს პრეზიდენტის სამთავრობო თვითმფრინავების ერთ-ერთი მთავარი ბაზა. იქ ხშირად სრულდება აშშ-ის ხელისუფლების ოფიციალური რეისები და სწორედ იქ არის განთავსებული პრეზიდენტის “ბორტი ნომერი პირველი”.
Boeing C-17 Globemaster III მძიმე სამხედრო-სატრანსპორტო თვითმფრინავია, რომელიც შორ მანძილზე ტვირთის, ტექნიკისა და პერსონალის გადასაყვანად გამოიყენება.
კონკრეტული თვითმფრინავი 2021 წელს ჟენევის აეროპორტშიც შენიშნეს, ვლადიმირ პუტინისა და აშშ-ს მაშინდელი პრეზიდენტის, ჯო ბაიდენის, სამიტამდე რამდენიმე დღით ადრე. იმ დროს გავრცელებული ინფორმაციით, თვითმფრინავს სამიტისთვის ავტომობილები, პერსონალი ან შესაბამისი აღჭურვილობა გადაჰქონდა.
ამერიკული თვითმფრინავის მოსკოვში ჩაფრენის მიზეზი ამ დროისთვის უცნობია.
The post აშშ-ის საჰაერო ძალების სამხედრო-სატრანსპორტო თვითმფრინავი მოსკოვის აეროპორტში დაეშვა appeared first on .