ცნობასააგენტო "პარალელი"
ტყის ფურისულა – Primula woronowii
ველური ბუნების ეროვნული სააგენტო საინტერესო ინფორმაციებს ავრცელებს კავკასიის ენდემურ სახეობაზე – ფურისულაზე:
იცოდით, რომ ტყის ფურისულას ლათინური სახელი ‘Primula’ პირდაპირ კავშირშია მის მთავარ დამახასიათებელ თვისებასთან, იყოს პირველი?
ველური ბუნების „გამოფხიზლების“ ერთ-ერთი მთავარი სიმბოლო ტყის ფურისულაა (Primula woronowii), რომელიც თოვლის სრულად დნობამდე იწყებს ყვავილობას და გაზაფხულის მოსვლას ნაზი იასამნისფერი ფურცლებით გვამცნობს.
Primula woronowii კავკასიის ენდემური სახეობაა და საქართველოში თითქმის ყველგან გვხვდება: დაბლობიდან მთის შუა სარტყლამდე. მისი საბინადრო ადგილი ნესტიანი, დაჩრდილული ფოთლოვანი ტყეები, მდინარისპირა ზოლები და კლდის ნაპრალებია.
როგორც ადრეული მოყვავილე მცენარე, ის კრიტიკულად მნიშვნელოვანია ეკოსისტემისთვის. ფურისულა არის ნექტარის ერთ-ერთი პირველწყარო ველური ფუტკრებისთვის და სხვა მწერებისთვის, რაც ხელს უწყობს ველურ ბუნებაში კვებითი ჯაჭვის შენარჩუნებას.
მცენარის ფოთლები მდიდარია C ვიტამინით და ფართოდ გამოიყენება ხალხურ მედიცინაში.
აღსანიშნავია ისიც, რომ საქართველოს სხვადასხვა რეგიონში ამ მცენარეს განსხვავებული სახელით იცნობენ. გაგვიზიარეთ, როგორ მოიხსენიებენ ფურისულას თქვენს კუთხეში?